مرحبا ياحي هالصوت والله العظيم
كنت ميت بس هالحين دبت فالحياه
صوت من حبه بداخل معاليقي مقيم
لو يجي غيره ملايين ماشيٍ محاه
منطبع فالقلب ثابت من الوقت القديم
الا راسي مثل ابانات وجبال السراه
والله ان صوته مطر للفواد المستهيم
والله ان قلبي محل لين يروى من حكاه
ان وقف هيبة ملك وان مشى مثل النسيم
تبتهج من مشيته لرض والورد وشذاه
خالقه ربي منزّه وله قدرٍ حشيم
حسن خلق وحسن مظهر وله هيبه وجاه
والله ان فرقاه تكوي مثل نار الهشيم
والله ان لاماه للقلب هي داه ودواه
ان رجع لي رد قلبي ولازمني النعيم
وان رحل مني خذ النوم وفوادي معاه
وان عذلني من محبته مخلوقٍ غشيم
جعل يصبح حبةٍ والزمن يصبح رحاه
واحدن ماجرب العشق وفواده سليم
لايعذل القلب ياناس من شيٍ بغاه
صوت خلي جنة القلب وفراقه جحيم
والله ان اموت واحيا وقلبي مانساه!!
الرئيسية 
الأربعاء أغسطس 17, 2011 3:55 pm
